කතුරු මුරුංගා කොළ ආහාරයට ගැනීමේ ගුණ 7ක්
කතුරුමුරුංගා අපේ රටේ මෙන්ම ඉන්දියාව, පිලිපීනය , මැලේසියාව ආදි වෙනත් ආසියාතික රටවල ද ජනප්‍රිය ගෙවතු ශාකයකි. එම ගසක් මිටර් 6-9 ත් අතර උස ප්‍රමාණයකින් වැඩෙයි. රනිල කුලයට අයත් කතුරුමුරුංගා වල මේරු පත්‍ර තද කොළ පැහැති වන අතර ළපටි ඒවා ලා කොළ පැහැයක් ගනියි.මල් වසරේ සෑම කාලයකදීම දැකිය හැකි අතර ගසේ හටගන්නා දිගු කරල් බීජ රැසකින් සමන්විත ඒවා වේ.සුදු මල් සහ රතු මල් ප්‍රභේද සුලබව දැකිය හැකියි.
කතුරුමුරුංගා ඉතා ගුණදායි ආහාරයක් ලෙස හැඳින්වේ. ආයුර්වේදයේ මේවා අගස්ති යන අන්වර්ථ නාමයෙන් හැඳින්වෙන බව අසන්නට ලැබේ.කටේ උෂ්ණ බිබිලි හෝ කට දෙපස පැළුණු විට පිළියමක් සේ කතුරුමුරුංගා කිරි හොදි පරිභෝජනය කරයි.මේවා පොල් යොදා මැල්ලුම් ලෙස ද සකසා ගනියි. ඒවායේ මල් ද ඉතා රසවත් ක්‍රම රැසකට සකසා ගත හැක. බැටර් එකක් සාදා එහි පොඟවා ගැඹුරු තෙලේ බැදීම එවැනි රසවත් ක්‍රමයකි. මේවා සුප් වලට වගේම කැඳ සැකසීමේදී ද එක්කරයි.
කතුරුමුරුංගා වල අඩංගු ප්‍රධාන පෝෂ්‍ය පදාර්ථ රැසකි. කොළ ග්‍රෑම් 100 ක අඩංගු කැලරි අගය 93 කි.ඒවායේ ප්‍රෝටීන්, කැල්සියම්, පොස්පරස්, යකඩ, පිෂ්ටය, විටමින් ඒ,විටමින් සී, රයිබොෆ්ලැවින්, නියැසින් වැනි පෝෂක ප්‍රධාන වශයෙන් අඩංගුය. කතුරුමුරුංගා මල් වල ප්‍රෝටීන,තයමින්, නිකොටින් අම්ල සහ තන්තු පෝෂක අඩංගුය. කතුරුමුරුංගා රසායන ගුණ ඉතාම වැඩි ඖෂධීය ශාකයක් ලෙස හඳුන්වන්නේ මේ නිසා විය යුතුය.
කතුරුමුරොංගා කොළ පෙනීම වඩවන බව පැවසේ.කිරි පණුවන් නැසීමට, මලබද්ධය දුරුකිරීමට, පිළිකා ඇතිවීම මර්දනය කිරීමට, පීනස නැසීමට ඇතුලු සෞඛ්‍ය පීඩා දුරුකිරීමට කතුරුමුරුංගා ගුණදායක බව අසන්නට ලැබේ. අජීර්ණය, උදරයේ ගෑස් ගතිය , බඩපිපුම තත්වයන්ට ගුණදායක බව කියවේ. සමේ ඇතිවන ලප කැලැල් දුරුකරගැනීමට කොළ ඉස්ම ආලේප කිරිම තවත් ප්‍රතිකර්මයකි.
කතුරුමුරුංගා පරිභෝජනය කිරීමෙන් අපේ සිරුරට ලැබෙන තවත් සෞඛ්‍යය ප්‍රතිලාභ
1.රුධිර පීඩනය අඩු කර ධමනි නම්‍යශීලීව තබා ගැනීමට උදව් කරයි
ඔබේ සාමාන්‍ය ආහාර වේලෙහි විටමින් සී පොහොසත් ආහාර ඇතුළත් කිරීම හෘද සෞඛ්‍යයට ප්‍රබල කාර්යභාරයක් ඉටු කරයි. විටමින් සී වැනි ප්‍රතිඔක්සිකාරක බහුල ආහාරයක් ගන්නා අයට අධි රුධිර පීඩන අවදානම අඩුය. කතුරුමුරුංගා විටමින් සී ලබා ගැනීම සඳහා හොඳම විකල්පයන්ගෙන් එකක් වන අතර කතුරුමුරුංගා කෝප්පයක විටමින් සී මිලිග්‍රෑම් 14.6 කින් සමන්විත වන අතර එය දෛනික නිර්දේශිත වටිනාකමෙන් 16.22 % කි.ධමනි ඝනවීමේ ප්‍රගතිය මන්දගාමී කිරීම (ධමනි සිහින් වීම) සඳහා විටමින් සී ද වැදගත් කාර්යභාරයක් ඉටු කරයි. එය ඔබේ ධමනි නම්‍යශීලීව තබා ගැනීමට සහ LDL කොලෙස්ටරෝල් වලට වන හානිය වළක්වයි. සිරුරේ විටමින් සී අඩු මට්ටමක් පවතින පුද්ගලයින්ට හෘදයාබාධ, පර්යන්ත ධමනි රෝග සහ ආඝාතය ඇතිවීමේ අවදානම වැඩි ය. මේ සියල්ල ධමනි සිහින් වීම නිසා ඇතිවිය හැකිය.
2.සාමාන්‍ය භ්‍රෑණ (කලල) සංවර්ධනයට සහාය වේ
කතුරුමුරුංගා වල ඇති ෆෝලේට් භ්‍රෑණ වර්ධනය සඳහා අත්‍යවශ්‍ය කාර්යභාරයක් ඉටු කරන අතර ගර්භනී කාන්තාවන්ට ප්‍රයෝජනවත් වේ. මුල් ගර්භනී අවධියේදී ෆෝලේට් ඌනතාවය නිසා ස්නායුක නල (neural tube) දෝෂ ඇති විය හැක. එය බරපතල ගැටළුවකි. පිළිසිඳ ගැනීමට මාසයකට පෙර සිට මාස 3 ක් දක්වා ෆෝලේට් මට්ටම ඉහළ නංවාගැනීම මෙම අඩුපාඩු අවදානම 50% කින් අඩු කර ගැනීමට සහය දෙන බව අධ්‍යයන මඟින් සොයාගෙන ඇත. කතුරුමුරුංගා වැනි ෆෝලේට් පොහොසත් ආහාර පරිභෝජනය කිරීම සිරුරට විටමින් බී 9 ලබාදේ.
3.සමට හිතකරයි
යකඩ ඌනතාවය හේතුවෙන් ඇතිවන රක්තහීනතාවයේ වඩාත් සුලභ සංඥාවක් වන්නේ සුදුමැලි සම සහ අඳුරු කවයන් (dark circles) ය. යකඩ නොමැතිකම නිසා හිමොග්ලොබින් මට්ටම අඩුවීමට හේතු වන අතර එහි ප්‍රතිඵලයක් ලෙස රතු රුධිර සෛල අඩු වේ. ඔක්සිජන් ප්‍රවාහය අඩු වීමෙන් ඔබේ සමේ පැහැය නැති වී යන අතර සුදුමැලි පෙනුමක් ලබා දෙයි. යකඩ බහුල ආහාර පරිභෝජනය කිරීමෙන් සමට ප්‍රාණවත් පෙනුමක් ලැබෙයි.කතුරුමුරුංගා වල යකඩ අඩංගු බැවින් නිතිපතා යම් ප්‍රමාණයක් ආහාරයට ගැනීම ඉතා ගුණදායක වනු ඇත.
4.ප්‍රතිශක්තිය වැඩි කරයි
ප්‍රතිශක්තිකරණ පද්ධතියේ නිසි ක්‍රියාකාරිත්වය සඳහා සෙලේනියම් අත්‍යවශ්‍ය වන අතර එච්.අයි.වී ඇතුළු වෛරස් වර්ධනය අවම කිරීම සඳහා ප්‍රධාන පෝෂ්‍ය පදාර්ථයක් ද විය හැකිය. දැනටමත් එච්.අයි.වී ආසාදිත රෝගීන් තුළ සෙලීනියම් ඒඩ්ස් රෝගයට ගොදුරු වීම මන්දගාමී කිරීමටද ප්‍රයෝජනවත් බව පෙන්වා දී ඇත. ඔබේ සාමාන්‍ය ආහාර වේලෙන් සෙලේනියම් ලබා ගත හැකි හොඳම විකල්පය වන්නේ කතුරුමුරුංගායි.
5.ඇල්සයිමර් රෝගය වළක්වයි
කතුරුමුරුංගා විටමින් බී 1 වලින් සමන්විත වන අතර එය ඇල්සයිමර් රෝගයේ ප්‍රගතිය මන්දගාමී කරයි. මෙම රෝගයෙන් පෙළෙන පුද්ගලයින් දිනකට මිලිග්‍රෑම් 100 ක විටමින් බී 1 අතිරේකය සමඟ ප්‍රතිකාර කළ විට ප්‍රතිලාභ ලබා ඇත. එබැවින් ඔබේ නිතිපතා ආහාර වේලට කතුරුමුරුංගා ඇතුළත් කිරීම විටමින් බී 1 ලබා ගැනීම සඳහා ප්‍රයෝජනවත් වේ. මෙය සිදු වන යාන්ත්‍රණය ගැන වැඩිදුර නිශ්චය කිරීම සඳහා ප්ලේසෙබෝ පාලනය කළ අත්හදා බැලීම් පර්යේෂණ සිදු වෙමින් පවතී.
6.ඉරුවාරදය
ප්‍රමාණවත් තරම් රයිබොෆ්ලැවින් සිරුරට නොලැබෙන පුද්ගලයින් නිතිපතා හිසරදය සහ ඉරුවාරදය පවා අත්විඳිති. කෙසේ වෙතත්, පුද්ගලයෙකුට ප්‍රමාණවත් රයිබොෆ්ලැවින් ලබා ගත් විට, හිසරදය අඩු වේ. රෝගීන් 55 දෙනෙකු පිළිබඳ කරන ලද පර්යේෂණයකින් හෙළි වූයේ රයිබොෆ්ලැවින් මිලිග්‍රෑම් 200-400 ක් ගත් අයට ප්ලේසෙබෝ ලබා දුන් අයට වඩා ඉරුවාරදය හා හිසරදය අඩු බවයි. මෙය හිසරදයේ වාර ගණන සහ තීව්‍රතාවය යන දෙකම අඩු කළේය. එබැවින් ඉරුවාරදය පිළිබඳ ගැටළු විසඳීමට සහ සෞඛ්‍ය සම්පන්න සහ ප්‍රීතිමත් ජීවිතයක් ගත කිරීම සඳහා විටමින් බී 2 පොහොසත් ආහාර පරිභෝජනය කළ යුතුය.
7.අප්‍රාණිකත්වය දුරුකරයි
මාංශ පේශි දුර්වලතාවය, හිරිවැටීම, තෙහෙට්ටුව සහ ඒ හා සමාන රෝග වැනි සුළු සෞඛ්‍ය ගැටලු දුරුකිරීමේ හැකියාව කතුරුමුරුංගා සතුව ඇත. ශරීරයේ පොස්පරස් සාමාන්‍ය මට්ටමක පැවතීම යෝග්‍ය හා ක්‍රියාශීලීව සිටීමට හොඳ ක්‍රමයකි. ඒ හැරුණු විට ශරීරයට පොස්පරස් සෞඛ්‍ය සම්පන්න මාත්‍රාවකින් ලබා දීමෙන් ලිංගික දුර්වලතා සුව කළ හැකි අතර, ඔබේ පද්ධතිය තුළ ප්‍රමාණවත් තරම් පොස්පරස් සැපයුමක් ලබා ගැනීමෙන් බෙලහීනතාවය, ලිංගික උත්තේජනය අඩුවීම වැනි ගැටළු සමනය විය හැකිය.
පූර්වාරක්ෂා-විශාල කොළ ප්‍රමාණයක් පරිභෝජනය කිරීමෙන් පාචනය ඇති විය හැක.